Ísfélag Vestmannaeyja hf. og Fjárfestingafélagið Kristinn ehf. í Vestmannaeyjum hafa undirritað samning um kauprétt á öllum hlutum Stillu og fleiri félaga í eigu bræðranna Guðmundar og Hjálmars Kristjánssona í Vinnslustöðinni í Vestmannaeyjum. Um er að ræða tæplega þriðjungshlut í Vinnslustöðinni.

Samningurinn er undirritaður í nafni óstofnaðs hlutafélags í eigu Ísfélagsins og Kristins, sem er í eigu aðaleigenda Ísfélags og er að því stefnt að fjölga hluthöfum þess, einkum úr röðum heimamanna að því er fram kemur í fréttatilkynningum.

Í tilkynningunni segir að markmið kaupenda sé að eignast í það minnsta 35% hlut í félaginu og ná samkomulagi við meirihlutaeigendur félagsins og stjórnendur um rekstur þess.

Þá segir að undanfarna mánuði hafi ríkt ókyrrð í kring um Vinnslustöðina og eigendur átt í harðvítugum deilum. Margir Eyjamenn hafa óttast að svo kunni að fara að heimamenn misstu tök á félaginu og hætta væri á að aflaheimildir yrðu fluttar frá Vestmannaeyjum með alvarlegum afleiðingum fyrir atvinnulíf og íbúa. „Við slíkt ástand verður ekki unað enda er Vinnslustöðin einn burðarása atvinnulífs í Vestmannaeyjum”, segir í tilkynningunni. Að mati kaupenda er Vinnslustöðin áhugavert félag og rekstur þess vænlegur til framtíðar litið.

Í tilkynningunni segir ennfremur að mýmörg tækifæri séu að mati kaupréttarhafa til samvinnu á mill Ísfélagsins, Vinnslustöðvarinnar og fleiri aðila í útgerð og vinnslu í Vestmannaeyjum og verður í framhaldi samningsins látið reyna á vilja meirihlutaeigenda Vinnslustöðvarinnar til slíks samstarfs til eflingar atvinnulífi í Vestmannaeyjum.