ÍBV strákarnir léku með hjartanu gegn Aftureldingu í dag. Þrátt fyrir hvert áfallið á fætur öðru að undanförnu gáfu strákarnir ekki upp vonina. Samheldi, gleði og barátta var einkennandi í hópnum síðustu daga.

Við fengum nýjan leikmann til okkar í gær.Hann heitir Sergiy Trotsenko og kemur frá Úkraínu. Hann þurfti að ferðast um langan veg til að koma til Eyja. Ferðin byrjaði á miðvikudaginn. Fyrst 1.000 km. í járnbrautalest frá austur hluta Úkraínu til höfuðborgarinnar Kiev. Þar þurfti hann að fara í norska sendiráðið og fá vegabréfsáritun, sem hann fékk ekki. Hann hringdi í Gintaras. Gintaras í mig, ég í Sjóvá, Þjóðskrá og að endingu í Útlendingastofu. Sólveig hjá Útlendingastofu hringdi sjálf út til þeirra í norska sendiráðinu og fékk þá til að gefa honum áritunina tíu mínútum fyrir lokun. Var um smámunasemi norðmannanna að ræða. Þaðan hélt hann út á flugvöll og flaug um nóttina til Parísar. Beið á flugvellinum í París í nokkra klukkutíma og flaug þá til Keflavíkur. Lenti á Íslandi kl.16:05 í gær og kemur þá í ljós að allur farangur hans var týndur. Hjálmar Baldursson beið eftir honum og keyrði honum beint í Herjólf. Þar tók við Herjólfsferð dauðans í 9 metra ölduhæð. Kominn til Eyja kl 22:35 tæpum þremur sólahringum frá því að hann lagði af stað. Spilar síðan leik í dag kl.15:00 og skoraði 8 af 24 mörkum ÍBV.

ÍBV byrjaði ekki vel og var komið 6 mörkum undir. En eftir leikhlé var eins og nýtt lið væri komið í hvítu treyjurnar. Og “Slæmi kaflinn” sem alltaf hefur verið í byrjun seinni hálfleiks varð “Góði kaflinn” eins og reyndar allur seinni hálfleikur. Frábært hjá ykkur strákar og Gintaras.

http://maggibraga.blog.is/blog/maggibraga/