Það var eflaust mörgum sem brá í gær þegar sólin lét sjá sig enda farið lítið fyrir henni að undanförnu. Í dag má þó búast við henni aftur. Smá skýjahula er yfir þessa stundina en ætti hana að leysa þegar líður á daginn.
Ástæða þess er hæðarhryggur á Grænlandshafi sem þokast nær landinu. Hann verður svo kominn vel yfir land á morgun og ætti honum að fylgja talsvert sólskin og allt að 19 stiga hita sunnanlands.
Það er þó ekki líklegt að blíðan staldri lengi við því nýjar lægðir og úrkomusvæði nálgast.
Svona er spáin næstu daga:
Á þriðjudag:
Hæg norðlæg eða breytileg átt og léttskýjað á vestanverðu landinu, en skýjað eystra og þokuloft eða súld við ströndina. Hiti 10 til 19 stig, hlýjast sunnan til.
Á miðvikudag:
Hæg suðlæg átt og bjart með köflum, en dálítil væta við suður- og vesturströndina um kvöldið. Hiti 12 til 17 stig að deginum.
Á fimmtudag:
Hægir vindar, skýjað með köflum og yfirleitt þurrt, en áfram fremur hlýtt.
Á föstudag:
Sunnanátt og rigning eða súld, en lengst af þurrt norðaustan til. Milt veður.
Á laugardag:
Vestlæg eða breytileg átt og víða skúrir eða dálítil rigning og kólnar lítið eitt.
Á sunnudag:
Útlit fyrir norðlæga átt með lítils háttar vætu úti við norðurströndina, en annars bjart með köflum og fremur svalt.
Það er því um að gera að njóta á meðan er.