Aðalfundur Farsæls félags smábátaeigenda í Vestmannaeyjum fór fram á dögunum. Þar kusu félagar sér nýjan formann, Hrafn Sævaldsson. Hann tekur við af Jóel Andersen, formanni til tuttugu ára.
Í upphafi fundar minntust menn kærs félaga Bergvins Oddssonar, sem lést þann 22. september sl. Beddi á Glófaxa, eins og hann var ætíð kallaður, var félagi í Farsæli og var að leggja lokahönd á nýjan 12 tonna bát Glófaxa VE 300.
„Jóel Andersen, sem verið hefur formaður Farsæls í tuttugu ár, tilkynnti að hann óskaði ekki eftir endurkjöri. Hrafn Sævaldsson var kjörinn formaður með lófataki. Hrafn þakkaði Jóel fyrir mikið og gott starf í þágu trillukarla í Vestmannaeyjum. Hægt og bítandi hefur fjölgað í félaginu á undangengnum árum og félagið því verið að styrkjast.” Segir í fundargerð Farsæls.
Strandveiðar voru mest til umræðu á fundinum, enda flestir félagsmenn sem stunda þær. „Smábátasjómenn lýstu óánægju sinni með skerðingu réttinda sem orðið hefðu á milli áranna 2018 og 2017, en þá fækkaði leyfilegum veiðidögum um 20, úr 68 dögum árið 2017 niður í 48 daga árið 2018. Bátar í Eyjum þurftu að stoppa veiðar áður en almanaksmánuði var lokið á veiðitímabilinu og því er um afturför að ræða fyrir smábátasjómenn á svæði D að þessu leyti.”
Félagsmenn Farsæls leggja áherslu á að strandveiðar fái að hefjast fyrr enda er fiskgengd við Eyjar hvað mest í apríl. „Ýmislegt gott hefur áunnist en stöðugt þarf að vinna í því að fjölga strandveiðidögum og lengja þarf tímabilið.”
