Brynjólfur VE gerir það gott á fiskitrolli og var næstaflahæstur tollbáta á landinu í desember og er líka í öðru sæti sem stendur í janúar.
Eftir að humarveiðum lauk í september var ákveðið að prófa að gera Brynjólf út til botnfiskveiða með tveimur fótreipstrollum. Það hefur aldeilis skilað lukkast vel.
Samkvæmt vefnum aflafrettir.is var Steinunn SF-10 aflahæsti trollbátur landsins í desember 2018 með 289 tonn. Í öðru sæti varð Brynjólfur með 271 tonn.
Þegar janúar 2019 er nú liðinn að tveimur þriðju hlutum er Sigurborg SH-12 aflahæst trollbáta með 93 tonn og Brynjólfur VE kemur næstur með 74 tonn.
Óhætt er því að segja að áhöfnin á Brynjólfi hafi fiskað vel. Árangur hennar vekur verðskuldaða athygli meðal þeirra sem fylgjast með í þessum geira sjávarútvegsins!
Heildarafli Brynjólfs VE frá því í október er um 930 tonn, þar af var landað liðlega 60 tonnum úr skipinu um nýliðna helgi.
Drangavík er einnig á fiskitrolli og notar eitt bobbingatroll. Afli Drangavíkur hefur verið mjög góður á sama tímabili (frá í október 2018), þrátt fyrir að skipið hafi verið frá veiðum í rúman mánuð, þegar það var í slipp frá miðjum nóvember fram í miðjan desember.
Heildarafli Drangavíkur er um 530 tonn frá því í októberbyrjun.
