Keppni á fjórða og síðasta degi Íslandsmótsins í golfi í Vestmannaeyjum hefur verið frestað vegna veðurs. Keppni hófst klukkan sex í morgun og eru margir keppendur langt komnir með lokahringinn.
Þetta kemur fram í tilkynningu frá Golfsambandinu og fer mótstjórn yfir stöðuna. Keppni hefst í fyrsta lagi kl. 13.00 og fá keppendur upplýsingar sendar í SMS um kl. 12:00.
Gul viðvörun er í gildi á Suðurlandi og í Faxaflóa og verður þangað til klukkan 15.00 í dag, að öllu óbreyttu. Hvassast er við Suðurströndina, frá Vestmannaeyjum að Reykjanesi.
Mbl.is hefur eftir Birgi Erni Höskuldssyni, veðurfræðingi í morgun að upp úr klukkan þrjú ætti að draga úr vindinum talsvert.
Mynd Addi í London:
Perla Sól Sigurbrandsdóttir GR var efst kvenna eftir gærdaginn, lék á 69 höggum sem er eitt undir pari vallarins. Perla Sól er 15 ára.
