Sýningin Við gosið verður opnuð á föstudag kl. 16.00 á Hafnartorgi Gallery, í rými sem er næst Hótel Edition við höfnina. Sýningin verður opin frá klukkan 12.00 til 17.00 á laugardag og 12.00 til 15.00 á sunnudag.

Ljósmyndasýningin Við gosið í Hafnartorgi Gallery sýnir valdar myndir Sigurgeirs af gosinu, þ.á.m. eina af frægustu myndum Sigurgeirs, Landakirkju með eldhafið að baki sér. Áræðinn og frakkur stóð Sigurgeir Jónasson (f. 1934) andspænis eldgosinu í Heimaey og myndaði það sem fyrir augum bar. Hann segir sjálfur ekki hafa hugsað rökrétt, náttúran var í aðalhlutverki og hann vissi að hlutverk hans var að mynda atburðinn og framvinduna.

“Það er vandasamt verk að velja myndir af gosinu úr safni Sigurgeirs en það hleypur á þúsundum ljósmynda. Hann hefur skrásett hluta af heildarsafninu en í heildina telur það milljónir mynda. Sigurgeir valdi að vera eftir í Eyjum, vera við gosið og sendi fjölskylduna upp á land þegar gosið hófst enda átti það hug hans allan. Það er aðdáunarvert að sjá hvernig Sigurgeir aðskildi sig frá verkefninu en nýtti styrkleika sína við tökur. Hann þekkti hvern hól, hvert hús, veðrið og náttúru Eyjanna og tókst á við verkefnið af fagmennsku,“ segir Vala Pálsdóttir sýningarstjóri.

Sýningin Við gosið verður aðgengileg á opnunartímum Hafnartorgs Gallery fram til 3. september nk.

Ein af ljósmyndum Sigurgeirs en á sýningunni verða hátt í 80 skipamyndir af þeim bátum sem sigldu gosnóttina frá Eyjum.