Yfir okkur Eyjamönnum og öðrum sem lifa á sjávarútvegi vofa nú yfir frumvörp sem koma til með að skaða samfélag okkar verði þau lögfest. Þrátt fyrir fögur fyrirheit hafa áhrif þeirra ekki verið milduð og skollaeyrum hefur verið skellt við þeim tuga álita sem sérfræðingar hafa skilað inn til atvinnuveganefndar. Hvað frumvarp um veiðigjald varðar þá er enn áætlað að innheimta 70% veiðigjald af metnum hagnaði veiða og vinnslu, þannig að það er nánast engin breyting frá fyrri tillögum. Ekki hefur heldur neitt komið fram um að bæta eigi frumvarp um breytingar á stjórn fiskveiða. Frumvörpin eru því enn meingölluð.