Peningastefnunefnd Seðlabanka Íslands ákvað í dag að lækka stýrivexti bankans um 0,25 prósentustig. Þetta er í fyrsta sinn síðan í nóvember árið 2020 sem Seðlabankinn lækkar vextina og eru meginvextir bankans núna 9%. Hafa verið 9,25 frá því í ágúst á síðasta ári. Ástæðan er m.a. minni verðbólga sem mældist 5,4% í síðasta mánuði. Lítið skref og jákvætt en Seðlabankinn vill fara hægt í sakirnar.
„Áfram virðist hægja á efnahagsumsvifum í takt við aukið peningalegt taumhald. Þá eru vísbendingar um að dregið hafi úr spennu á vinnumarkaði og svartsýni heimila og fyrirtækja hefur aukist,“ segir í tilkynningu bankans og er hvatt til varkárni. Áfram þurfi að viðhalda hæfilegu aðhaldsstigi til þess að koma verðbólgu í markmið innan ásættanlegs tíma.
Í síðasta mánuði hækkuðu stóru bankarnir vexti sína sem ekki er til að létta róður skuldsettra heimila en til mikils er að vinna, að ná tökum á verðbólgu og að vextir lækki. Er það ein forsendan fyrir kjarasamningunum í mars á þessu ári.
Lækkun skiptir máli
„Þá er komið að lið sem skiptir mestu, sem er lækkun verðbólgu og stýrivaxta og verður helsta kjarabótin gangi hún eftir,“ sagði í viðtali í Eyjafréttum við Arnar Hjaltalín, formann Drífanda stéttarfélags um samningana í mars.
„Sem dæmi má nefna að lækkun vaxta um 1 prósent á 25 milljón króna láni skilar rúmum 400.000 krónum á ári beint í vasann. Verði lækkunin 2,5% losar það rúma milljón sem sýnir að til mikils er að vinna. Af 33 milljóna króna láni eru samsvarandi kjarabætur liðlega 530.000 krónur upp í 1.329.000 krónur.“
Þetta sýnir að hvert skref niður á við skiptir máli.
Skráðu þig á fáðu nýjustu tilkynningar fyrst