Það er óhætt að segja að sumarið hafi farið vel af stað hjá Herjólfsfólki. Flutningar hafa aldrei verið eins miklir í maímánuði og breytir þá engu hvort horft er í flutning á farþegum, bílum eða þungaflutningum.

„Maímánuður hefur verið mjög góður undanfarin þrjú ár“ segir Ólafur Jóhann Borgþórsson, framkvæmdastjóri Herjólfs í stuttu spjalli við blaðamann Eyjafrétta og heldur áfram.

Met í þungaflutningum einnig

„Loksins komumst við í gegnum 50 þúsund farþega múrinn og bættum þar með þriggja ára gamalt met um tæplega fjögur þúsund farþega. Bílarnir fóru í fyrsta sinn yfir 14.000, en alls flutti Herjólfur 14.064 bíla í mánuðinum og þungaflutningar hafa aldrei verið eins miklir í einum mánuði, en alls flutti Herjólfur 837 vagna og flutningabíla.“

Aðspurður segir Ólafur skýringuna fyrst og fremst liggja í tvennu, annars vegar í einstöku blíðviðri í maí og hins vegar góðri markaðssetningu undanfarin ár bæði hjá Herjólfi og Ferðamálasamtökum Vestmannaeyja sem og annara ferðaþjónustuaðila í Eyjum sem hefur sannarlega verið að skila sér.

„Við sjáum það mjög glögglega í farþegatölunum hjá okkur að þegar átak hófst í markaðssetningu fyrir nokkrum árum á Vestmannaeyjum sem spennandi áfangastað ferðamanna fóru farþegatölur að rísa. Við höfum því ákveðið að gefa enn frekar í eins og sjá má samfélagsmiðlunum okkar, þar sem fylgjendur okkar skipta þúsundum.“

Betri bókunarstaða

Aðspurður um útlitið fyrir sumarið kveðst Ólafur vera bjartsýnn. „Bókunarstaðan er betri en á sama tíma í fyrra fyrir næstu vikur og mánuði, en við vitum líka að veðrið er stóri áhrifaþátturinn og það er ekki alveg að vinna með okkur svona fyrstu dagana í júní. En að sjálfsögðu stefnum við að nýju meti í júní segir Ólafur að lokum.