Það var líflegt um að litast á athafnasvæði Vinnslustöðvarinnar í morgun. Drangavík VE kom til hafnar með fullfermi. Löndun hófst fljótlega eftir komu skipsins, að því er segir í færslu á facebook-síðu Vinnslustöðvarinnar.

Jón Ólafsson var skipstjóri í veiðiferðinni sem gekk vel, þrátt fyrir að skipið hafi lent í brasi fyrr í vikunni. Á mánudag þurfti að draga skipið til hafnar vegna vandamála, en að sögn skipstjóra reyndist allt í lagi að lokinni yfirferð og viðgerð. Haldið var aftur til veiða á miðvikudag. Veitt var við Ingólfshöfða og var afli góður, einkum þorskur og ýsa.

Samhliða komu Drangavíkur stendur loðnuvinnsla yfir hjá Vinnslustöðinni. Gullberg VE er að landa loðnu sem fer í heilfrystingu og fór Huginn VE til veiða í morgun til að sækja síðasta skammt loðnu sem fer í þá vinnslu. Að því loknu tekur við hrognafrysting. Sindri Viðarsson, sviðsstjóri uppsjávarsviðs hjá Vinnslustöðinni, segir stefnt að því að hún hefjist fyrir miðja næstu viku.

Sjá má myndasyrpu frá í morgun á facebókarsíðu Vinnslustöðvarinnar.