Vestmannaeyjadeild Rauða krossins var með opið hús í Arnardrangi í dag í tilefni af 85 ára afmæli deildarinnar. Fjöldi gesta lagði leið sína á staðinn, þar sem boðið var upp á veitingar og kynningu á starfsemi félagsins.

Afmælið markar mikilvæg tímamót í sögu félags sem hefur lengi verið órjúfanlegur hluti af samfélaginu í Eyjum. Í umfjöllun Eyjafrétta í gær kom fram að Rauði krossinn hafi frá fyrstu árum sinnt mikilvægu velferðarstarfi, átt þátt í uppbyggingu sjúkraflutninga og gegnt lykilhlutverki í neyðaraðstoð, meðal annars í gosinu 1973.

Starfsemin er enn fjölbreytt í dag og byggir sem fyrr á framlagi sjálfboðaliða. Opið hús dagsins gaf gestum tækifæri til að kynnast starfinu betur og rifja upp merka sögu Rauða krossins í Vestmannaeyjum.

Óskar Pétur Friðriksson og Halldór B. Halldórsson mættu í afmælið og má sjá myndefni þeirra hér að neðan.