Ágúst Gísli Helgason kom, sá og sigraði þegar úrslitakvöld Vöruhúsdeildarinnar fór fram síðastliðinn laugardag. Hann lagði Guðmund Tómas Sigfússon af velli í undanúrslitum í æsispennandi viðureign sem endaði 6-5. Það er óhætt að segja að leikurinn hafi verið sveiflukenndur en Ágúst vann fyrstu fimm leggina og allt stefndi í sannfærandi 6-0 sigur. Gummi náði hinsvegar að standast áhlaupið og vann næstu fimm leggi og knúði fram oddalegg. Ágúst vann þann legg og tryggði sig þar með inn í úrslitaeinvígið.

Þar mætti hann Bjarna Heimi Kristinssyni sem hafði betur gegn Sindra Orrasyni, 6-4, í hinum undanúrslitaleiknum. Sá leikur var líka jafn en augljóst var að hvorugur leikmaður náði að sína sitt rétta andlit. Tæknin stríddi mótshöldurum mikið í leiknum og hafði áhrif á spilarana. Sem betur fer var hægt að finna rót vandans og skera hana lausa.

Í úrslitaleiknum sjálfum vann Ágúst sannfærandi 7-2 sigur og var í kjölfarið krýndur meistari og fékk glæsilegan bikar að launum við mikinn fögnuð áhorfenda.

Það vantaði ekkert uppá mætinguna en sú staðreynd gladdi hjörtu þeirra sjálfboðaliða sem stóðu að keppninni. Að sama skapi var ánægjulegt að fylgjast með áhorfstölunum á YouTube streyminu sem sent var út í beinni útsendingu og svalaði þorsta þeirra sem ekki sáu sér fært að mæta. Það varð mótshöldurum ljóst að svona viðburður getur vel þrifist í ríkri menningarflóru eyjarinnar.

Veitt voru verðlaun fyrir eftirfarandi flokka:

1. sætið: Ágúst Gísli Helgason
2. sætið: Bjarni Heimir Kristinsson
3.-4. sætið: Guðmundur Tómas Sigfússon og Sindri Orrason
Flest 180 í deildinni: Sindri Orrason (13)
Hæsta útskot í deildinni: Aron Ingi Sindrason (147)
Besti leggur í deildinni: Atli R. Meldal Hreinsson, Garðar B. Sigurjónsson & Sigurður Guðnason (15)
Hæsta skor í partýpílunni: Sigurður Guðnason (180)

Mótanefnd PFV vill þakka Vöruhúsinu og Höllinni fyrir samstarfið og þeim Hödda, Kristjáni Loga, Tóta, Jökli Andra og allra hinna sem lögðu lóð sín á vogarskálarnar í undirbúningi þessa viðburðar.

Myndasyrpu frá kvöldinu má sjá hér að neðan.