Fræðsluráð Vestmannaeyja hefur tilnefnt þrjá fulltrúa í faghóp sem mun koma að hönnun nýs leikskóla í Löngulág. Fræðsluráð tilnefndi eftirfarandi fulltrúa í faghópinn: Eyju Bryngeirsdóttur, leikskólastjóra Kirkjugerðis, Helgu Björk Valgerðar Björnsdóttur, leikskólastýru á Sóla og Guðrúnu Þorsteinsdóttur, aðstoðarleikskólastjóra Víkurinnar.

Ráðið telur að með þessari skipan sé tryggð góð fagleg breidd og reynsla frá öllum leikskólum bæjarins, sem muni styðja vel við vinnu starfshópsins á hönnunarstigi.

Félagsmiðstöðin sigraði í Stíl – nemendur keppa áfram í Röddinni

Fræðsluráð Vestmannaeyja sendir Félagsmiðstöðinni hamingjuóskir eftir sigur í landskeppninni Stíl sem fram fór í Fagralundi. Ráðið hrósar jafnframt metnaðarfullu og skapandi starfi sem fram fer í félagsmiðstöðinni.

Einnig var þátttakendum í upplestrarkeppninni Röddinni óskað til hamingju með góðan árangur. Þrír nemendur munu keppa fyrir hönd Vestmannaeyja á Suðurlandi síðar í vor.