Alls eru nú 3.540 kjósendur á kjörskrá í Vestmannaeyjum fyrir sveitarstjórnarkosningarnar sem fram fara á morgun, laugardaginn 16. maí. Kjósendum hefur fjölgað talsvert frá síðustu sveitarstjórnarkosningum en árið 2022 voru 3.284 á kjörskrá og 3.162 árið 2018.

Samkvæmt upplýsingum frá Sýslumannsembættinu í Vestmannaeyjum höfðu 591 einstaklingar greitt atkvæði utan kjörfundar síðdegis í dag.

Kjörsókn í sveitarstjórnarkosningunum árið 2022 var 80,9% en árið 2018 var hún 83,2%. Til samanburðar voru 3.115 á kjörskrá í þingkosningunum árið 2024 og 3.092 í forsetakosningunum sama ár.