Allt slökkvi- og sjúkraflutningalið Vestmannaeyja var kallað út á ellefta tímanum í morgun  þegar eldur kom upp í vélbátnum Maggý VE 108, þar sem hann lá við bryggju Skipalyftunnar. Eldurinn kviknaði í vélarrúmi bátsins en slökkvistarf gekk greiðlega og fyrstu upplýsingar benda til að tjón sé ekki mikið.

„Við fengum tilkynningu um eld í báti og í ljós kom að um smávægilegan eld var að ræða í vélarrúminu. Búið er að slökkva eldinn og nú er verið að reykræsta. Tjón af völdum eldsins er væntanlega ekki mikið en erfitt er meta tjón af reyk á þessu stigi. Hjá okkur gekk allt samkvæmt áætlun, en við verðum alltaf að búa okkur undir það versta þegar eldur kemur upp í bátum og skipum,“ sagði Gústaf Adolf Gústafsson, varaslökkviliðsstjóri á vettvangi.

Lögreglan hefur hafið rannsókn á eldsupptökum. Samkvæmt heimildum var verið að ljúka framkvæmdum eftir vélaskipti og stóðu yfir suðuvinna á millivegg milli lestar og vélarrúms þegar eldur kviknaði í olíu í vélarrúminu. Enginn var í hættu og ekki urðu slys á fólki.

Maggý VE 108 er 113 brúttótonna stálskip, smíðað í Gdansk í Póllandi árið 1988 hjá Wisla Yard. Skipið er 25,94 metrar að lengd, 6 metrar á breidd, og er gert út af Narfa ehf. í Vestmannaeyjum. Það hét áður Ósk og hefur um árabil verið gert út til dragnóta- og humarveiða.