Fimmtudagskvöldið, 4. febrúar, á alþjóðadegi gegn krabbameinum, verður Kraftur með söfnunar- og skemmtiþáttinn „Lífið er núna“ í beinni útsendingu á Sjónvarpi Símans, K100 og í netstreymi á www.mbl.is.

Kraftur hefur fengið landsþekkta skemmtikrafta og tónlistarfólk í lið með sér til að skemmta áhorfendum og eru það engin önnur en GDRN, Valdimar, Ari Eldjárn, Sigríður Thorlacius og Páll Óskar sem munu stíga á stokk. Sóli Hólm og Sóley Kristjánsdóttir verða kynnar kvöldsins og munu þau einnig fá gott fólk í sófann til sín til að spjalla um málefni ungs fólks sem greinst hefur með krabbamein og aðstandenda.

„Þátturinn verður skemmtiþáttur en um leið söfnunarþáttur,“ segir Hulda Hjálmarsdóttir, framkvæmdastjóri Krafts. „Það skiptir okkur í Krafti miklu máli að njóta augnabliksins og ætlum við að bjóða landsmönnum að njóta með okkur fyrir framan sjónvarpsskjáinn fimmtudaginn næstkomandi ásamt því að kynna þeim starf félagsins. Við höfum fengið frábæra listamenn með okkur í lið og er ég viss um að allir munu geta notið stundarinnar með okkur,“ segir Hulda enn fremur.

Lífið er núna þátturinn er lokahnykkur í vitundar- og árvekniátaki sem Kraftur hefur nú staðið fyrir síðustu tvær vikurnar. Markmið átaksins er að vekja athygli á hversu marga krabbamein snertir, selja húfur til styrktar félaginu og starfsemi þess sem og að afla styrkja fyrir félagið. Um 70 ungir einstaklingar greinast með krabbamein á hverju ári og þegar fólk greinist með krabbamein hefur það ekki einungis áhrif á það heldur fjölmarga í kring þar á meðal maka, foreldra, börn, vini, vandamenn og jafnvel vinnufélaga.

Áhorfendur þáttarins geta lagt Krafti lið með því að kaupa húfur til styrkar félaginu, hringja inn í símaver og gerast mánaðarlegir styrktaraðilar eða gefa stakan styrk en einnig er hægt að senda SMS með  skilaboðunum Kraftur í símanúmerið 1900 og renna þá 2500 krónur til Krafts af næsta símreikningi.

Þennan dag verður einnig Vetrarhátíð sett en hún stendur yfir dagana 4. – 7. febrúar. Vegna sóttvarnarráðstafanna verður hátíðin með breyttu sniði í ár og lögð áhersla á list í almannarými, útilistaverk o.fl. Söfnunarþáttur Krafts er liður í hátíðinni en honum verður sjónvarpað frá Mál og menningu Laugavegi 18 og verða Kraftsfélagar þar fyrir utan að selja Lífið er núna húfurnar fyrir vegfarendur. Að auki verður Kraftur með grafískt „Lífið er núna“ listaverk á Laugavegi 31. „Við hvetjum fólk eindregið til að rölta niður í bæ og skoða listaverkin og kíkja við á Laugaveginum og taka mynd af sér hjá listaverkinu okkar og endilega deila henni jafnvel á samfélagsmiðlum með #lífiðernúna og sýna þar með samstöðu með Krafti og öllum þeim sem krabbamein hefur haft áhrif á,“ segir Hulda að lokum.