Gönguslóði á Heimakletti er afar illa farinn og er það forgangsatriði að laga hann, að mati starfshóps sem falið var að skoða innviði með tilliti til ferðaþjónustu í Eyjum. Framkvæmdasjóður ferðamannastaða hefur nú þegar veitt styrk að fjárhæð 11.180.000 til verkefnisins. Styrkir úr Framkvæmdasjóði ferðamannastaða miðast við 80% af áætluðum heildarkostnaði verkefnis hverju sinni en gert er ráð fyrir 20% mótframlagi sem getur verið í formi vinnuframlags.

Fram kom í afgreiðslu bæjarráðs í sumar að Heimaklettur sé forgangsverkefni og að huga þurfi að framlagi sveitarfélagsins, gera áætlun og kostnaðarmeta. Ljúka þarf við önnur verkefni sem hafa fengið styrk úr Framkvæmdasjóði ferðamannastaða. Huga þarf að framlagi sveitarfélagsins, gera áætlanir og kostnaðarmeta.

Að sögn Brynjars Ólafssonar, framkvæmdarstjóra umhverfis- og framkvæmdasviðs Vestmannaeyjabæjar er búið að meta ástandið á gönguleiðinni.

„Næsta skref er að fá stígahönnuð til að leysa þetta krefjandi verkefni og koma með tillögu að lagfæringum. Áætlað er að nýta vetrarmánuði undir þessa hönnunarvinnu og hefja lagfæringar næsta vor.“ segir hann í samtali við Eyjafréttir/Eyjar.net.