Þriggja mánaða uppgjör Vestmannaeyjabæjar var lagt fram á fundi bæjarráðs í vikunni. Fram kemur í fundargerð að lögð hafi verið fyrir bæjarráð drög að þriggja mánaða rekstraryfirliti Vestmannaeyjabæjar. Samkvæmt yfirlitinu eru heildartekjur samstæðunnar fyrstu þrjá mánuði ársins um 12,3% hærri en fjárhagsáætlun gerir ráð fyrir og heildarrekstrarkostnaður um 5,4% hærri en áætlunin. Rekstrarafkoma fyrstu þrjá mánuði ársins er betri en áætlanir gerðu ráð fyrir.

A-hlutinn lakari en áætlanir gerðu ráð fyrir

Einnig voru lögð fyrir bæjarráð drög að þriggja mánaða rekstraryfirliti fyrir sveitarsjóð. Samkvæmt yfirlitinu eru heildartekjur samstæðunnar fyrstu þrjá mánuði ársins um 0,3% hærri en fjárhagsáætlun gerir ráð fyrir og heildarrekstrarkostnaður um 4,0% hærri en áætlunin sem skýrist m.a. af auknum launakostnaði vegna nýgerðra kjarasamninga. Rekstrarafkoma fyrstu þrjá mánuði ársins er því lakari en áætlanir gerðu ráð fyrir.