Áform eru uppi um að reisa þrjú einbýlishús á reit við Reglubraut, þar sem áður stóð hús við Vesturveg 17b. Umhverfis- og skipulagsráð hefur samþykkt að hefja vinnu við breytingu á deiliskipulagi svæðisins.

Erindið barst frá Sigurjóni Ingvarssyni. Samkvæmt fyrirliggjandi gögnum er gert ráð fyrir þremur einbýlishúsum á einni hæð með risi á reitnum.

Í bókun umhverfis- og skipulagsráðs segir að byggingaráformin samræmist vel gildandi aðalskipulagi og falli vel að ásýnd og byggðarmynstri svæðisins.

Ráðið samþykkti því að hefja vinnu við breytingu á deiliskipulagi reitsins og fól skipulagsfulltrúa að ræða við lóðarhafa um framhaldið.