- Eyjafréttir
- ·
- Fréttir
- ·
Aftur heima - Goslokalag Vestmannaeyja 2018
Goslokalag Vestmannaeyja 2018 heitir Aftur heima og er eftir Björgvin E. Björgvinsson. Lagið er flutt af Söru Renee Griffin en undirleik sjá um þeir Birgir Nielsen á trommur, Kristinn Jónsson á bassa. Á píanó og orgel leikur Þórir Ólafsson, Gísli Stefánsson á gítar og Einar Hallgrímur Jakobsson á flugelhorn. Útsetning, upptaka og hljóðblöndun var í höndum Gísla Stefánssonar og Sæþórs Vídó.
Hlusta má á lagið í spilaranum hér að ofan, textann látum við einnig fylgja hér að neðan.
Aftur heima
Lag og texti: Björgvin E. Björgvinsson
Veðrið bjart og vonarkyrrðin ríkir.
Vaknar líf er morgunhaninn gelur.
Upp úr hafi austursólin kíkir,
undurhlý – og græna kolla telur.
:,: Urðabrimið skæð‘ í skjóli dvelur. :,:
Helgafellið sumarkjólnum klæðist.
Kinnaroði hlíðar Eldfells litar.
Mosinn út á marglitt hraunið læðist
– mjúkum höndum nýja sögu ritar.
:,: Múkkinn yfir Heimakletti hnitar. :,:
Á vestureynni fagur fjallasalur
flauelsmjúkt af slegnu grasi angar.
Kumpánlega heilsar Herjólfsdalur,
hlæja á móti sælurjóðir vangar.
:,: Um Fiskhellana fimur peyi sprangar. :,:
Eyjasólin bak við Blátind rennur.
Brekkuraddir líða upp um geima.
Á Fjósakletti skæra bálið brennur
og bjartar vonir inn í hugann sveima.
:,: Í Dalnum slær mitt hjarta aftur heima. :,:
