Íslenska u-20 ára landsliðið í handbolta lék fyrsta leik sinn á Evrópumótinu í Rúmeníu í dag. Íslenska liðið vann sterkan 32-27 sigur á Austurríki, eftir að hafa verið undir í hálfleik, 15-16. 

Íslenska liðið byrjaði leikinn ekki nægilega vel en náði hægt og rólega að vinna sig inn í leikinn. Eftir að liðið þétti raðirnar náðu strákarnir fljótt forystunni í síðari hálfleik og unnu að lokum fimm marka sigur. 

Eyjamennirnir Andri Erlingsson og Elís Þór Aðalsteinsson komust báðir á blað í leiknum. Andri var markahæstur með sjö mörk og Elís Þór skoraði þrjú mörk. 

Næsti leikur liðsins er á morgun gegn Spánverjum kl. 14:00.