Eyjamaðurinn Arnór Viðarsson heldur áfram að láta að sér kveða í sænsku úrvalsdeildinni í handbolta. Hann var markahæsti leikmaður HF Karlskrona þegar liðið tapaði 33-30 fyrir Sävehof á útivelli í gærkvöldi.

Arnór átti afar góðan leik þrátt fyrir tapið og skoraði alls níu mörk. Sebastian Durlanu var markahæstur í leiknum með 11 mörk fyrir Sävehof.

Með sigrinum komst Sävehof upp í þriðja sæti deildarinnar með 13 stig. Karlskrona er hins vegar í 10. sæti með sjö stig eftir níu leiki.

Næsti leikur Arnórs og félaga er á laugardaginn þegar Karlskrona tekur á móti Ystads IF á heimavelli.