Áslaug Arna Sigurbjörnsdóttir, háskóla- iðnaðar- og nýsköpunarráðherra tyllti niður tá með skrifstofu sína í Vestmannaeyjum í lok síðasta mánaðar. Kom hún sér fyrir í Þekkingarsetri Vestmannaeyja þar sem hún tók á móti gestum., auk þess sem hún heimsótti fyrirtæki. Áslaug Arna hefur sett upp skrifstofu víða á landsbyggðinni og vill með því stytta boðleiðir um leið og hún kynnir sér aðstæður á hverjum stað.

Háskóla- iðnaðar- og nýsköpunarráðuneytið varð til þegar núverandi ríkisstjórnarflokkar, Framsókn, Vinstri græn og Sjálfstæðisflokkur ákváðu að halda áfram samstarfi. Áslaug Arna gaf strax út að hið nýja ráðuneyti myndi auglýsa öll störf óháð staðsetningu og hæfni starfsfólks frekar en staður yrði látin ráða.

„Ég er hérna af því að ég er með skrifstofuna mína víðar en í Reykjavík,“ sagði Áslaug Arna þegar Eyjafréttir hittu hana á förnum vegi í Eyjum. „Ég ákvað að vera í Vestmannaeyjum í haust og hér eru frábærar aðstæður til að starfa í Þekkingarsetrinu í Vestmannaeyjum. Við stofnun ráðuneytisins tók ég það skref að störf verði auglýst óháð staðsetningu.

Þú getur farið með starfið annað, tímabundið eða til lengri tíma. Sjálf vildi ég líka gefa gott fordæmi með því að fara með mína eigin skrifstofu út á land og sýna fólki einstaka staði víða um land þar sem hægt er að starfa. Þetta er áttunda skrifstofan mín utan Reykjavíkur og gefur mér mikið að fá þetta góða samtal við fólk í samfélögum víða um land og að bjóða upp á opna viðtalstíma.

Þegar kemur að því að ráða starfsfólk á Eyjafólk eins og aðrir möguleika standist þeir kröfur án þess að þurfa að færa sig um set,“ sagði Áslaug Arna.

Aukin áhersla á iðnnám

Aðspurð um málaflokka í hennar ráðuneyti sem snertir samfélagið í Eyjum segir hún flesta málaflokkana skipta máli. Mikið sé kallað eftir auknu fjarnámi við háskóla, mikilvægt sé að efla iðnað alls staðar og aðgengi að iðnnámi m.a. á landsbyggðinni og nýsköpun er orðin stór hluti af litlum og stórum fyrirtækjum. ,,Ég hef stigið skref til að ýta undir aukið iðnnám með sérstöku samstarfi háskólanna og hvata með fjármagni til að bjóða upp á aukið fjarnám.“

Áslaug Arna heimsótti nokkur fyrirtæki í Vestmannaeyjum, átti fundi með bæjarráði og opnaði listasýningu ásamt því að bjóða fólki að eiga milliliðalaust samtal í Þekkingarsetrinu.

Mynd: Áslaug Arna með Ísfélagsmönnum. Eyþóri Harðarsyni og Stefáni Friðrikssyni.