„Bæjarráð Vestmannaeyja hefur mótmælt harðlega hækkunum á húshitunarkostnaði í Eyjum og óskað eftir skýringum hjá HS-veitum, Orkustofnun og orkumálaráðuneytinu. HS- veitur hafa sérleyfi og við íbúar getum bara skipt við það fyrirtæki þegar við kaupum varmaorku til húshitunar. Það er umhugsunarefni að varmadælustöðin virðist alls ekki skila neinni lækkun á gjaldskrá eins og lagt var upp með að hún ætti að gera,“ segir Íris Róbertsdóttir, bæjarstjóri á Facebokksíðu sinni í gær.

„Gríðarmiklar hækkanir hafa verið síðan í september, eða um 30% þegar allt er tekið með. Á fundi í vikunni með fulltrúum Orkustofnunar fékkst staðfest að orkumálaráðherra hefur lagt til, og það verið samþykkt, að auka niðurgreiðslu til íbúa í Vestmannaeyjum vegna húshitunar. Niðurgreiðslan var 147,80 kr./m³ en hækkaði í 158,74 kr./m³ 1. september 2023 og aftur í 201,06 kr./m³ frá 1. janúar 2024.

Fyrri hækkun niðurgreiðslna átti að koma fram á reikningum frá 1. september vegna hækkunar HS-veitna, en skilaði sé einhverra hluta vegna ekki til notanda. Orkustofnun upplýsti að þessi hækkun á niðurgreiðslum fyrir þessa mánuði myndi skila sér að fullu á næstu reikningum HS- veitna.

Síðasta hækkun niðurgreiðslunnar á að koma inn á reikninga frá 1. janúar 2024. Staðan er því sú að ríkið hefur hækkað sína niðurgreiðslu frá 1. september um 27 % til að mæta hækkunum HS-Veitna á gjaldskrá til húshitunar í Vestmannaeyjum. Þetta mun skila sér til íbúa á næstu reikningum og því milda mjög þær hækkanir sem hafa verið á gjaldskrá HS-veitna.

Bæjarráð Vestmannaeyja og aðrir kjörnir fulltrúar leggja sig alltaf fram fyrir íbúa Vestmannaeyja í öllum málum,“ segir Íris.

Mynd HS Veitur. Starfsmenn HS Veitna í Vestmannaeyjum hafa haft í mörg horn að líta undanfarið í rafmagns- og vatnsmálum.