Vestmannaeyjabær og HS veitur fara fram á fullar bætur, sem nema að minnsta kosti 1,5 milljörðum króna, vegna tjónsins sem varð á vatnslögn til Vestmannaeyja. Lögnin hafði skemmst þegar akkeri Hugins VE losnaði og festist í lögninni síðastliðinn Nóvember.
Í samtali við RÚV segir Sigurgeir Brynjar Kristgeirsson, framkvæmdastjóri Vinnslustöðvarinnar, að bænum hafi verið í lófa lagið að tryggja lögnina fyrir tjóni. Lögnin sé staðsett á ákveðnu hættusvæði í höfninni og hvaða skip sem er gæti hafa orðið fyrir því að þurfa að varpa akkeri.
Í bókun Írisar Róbertsdóttur bæjarstjóra segir að Vinnslustöðin, VÍS og Huginn ehf. viðurkenni bótaskyldu en að þeir vísi til siglingalaga sem takmarka tjónabæturnar við 360 milljónir króna.
Íris segir í samtali við RÚV að þrátt fyrir „gamlar klausur í siglingalögum“ þá sé hún bjartsýn á niðurstöðu málsins.
