„Þetta kemur mér í rauninni ekki á óvart miðað við allt sem á undan er gengið. Þegar hver dómsmálaráðherrann á fætur öðrum hefur haft það á stefnuskránni að fækka þessum embættum þá er alltaf spurningin hvenær það raungerist, hvað sem hver tautar og raular. Bæjarstjórn hefur háð mikla baráttu í gegnum tíðina gegn þessu en svo koma svona fréttir. Það er erfitt,“ sagði Njáll Ragnarsson, fulltrúi Eyjalistans í bæjarstjórn og formaður bæjarráðs um stöðu sýslumannsembættisins í Vestmannaeyjum.

„Ég held það sé ágætt að nota þetta tækifæri til þess að þakka Arndísi Soffíu fyrir það góða starf sem hún hefur unnið í þágu okkar Eyjamanna. Hún hefur svo sannarlega eflt embættið, fundið því ný verkefni og sinnt sínu hlutverki með miklum glæsibrag.

Bæjarstjórn mun funda með dómsmálaráðherra síðar í vikunni. Baráttan heldur áfram og snýst um það að efla embættið enn frekar,“ sagði Njáll.

Mynd: Arndís Soffía og Katrín Jakobsdóttir forsætisráðherra.