ÍBV tók á móti Val í hörkuleik í 8 liða úrslitum Coca Cola bikarsins í dag þar sem Valur sigraði með tveimur mörkum, 23-25. ÍBV byrjaði leikinn betur og voru að spila frábæra vörn og sókn. Strákarnir fengu aðeins tvö mörk á sig á fyrstu 15. mínútum leiksins en þá náðu Valsmen að koma þriðja markinu að og staðan 7-3. ÍBV fékk kjörið tækifæri til að auka muninn í fimm mörk en brenndu af í hraðaupphlaupi, í staðinn jafnaði Valur metin 7-7. Arnar Pétursson, þjálfari ÍBV tók þá leikhlé sem skilaði sér en strákarnir náðu aftur tveggja marka forskoti og héldu því til loka fyrri hálfleiks en þá var staðan, 13-11.

Valsmenn náðu fljótlega forskotinu í síðari hálfleik, 15-16, en þá kom góður kafli hjá ÍBV og leiddu þeir leikinn allt þar til að korter var eftir að sóknarleikurinn hrundi en markvarslan var nánast engin í síðari hálfleik en fyrsta varslan kom á 47. mínútu. Eyjamenn skoruðu ekki í mark í þrettán mínútur, Valsmenn nýttu sér það og breyttu stöðunni úr 21-19 í 21-24. Róðurinn var þá erfiður fyrir Eyjamenn en þeir fengu nokkur tækifæri til að ná Val á lokakaflanum en gekk ekki og lokatölur því 23-25 og Valsmenn á leið í “final four”.

Mörk ÍBV skoruðu þeir; Einar Sverrisson 6, Kári Kristján Kristjánsson 4, Agnar Smári Jónsson 4, Dagur Arnarsson 3, Andri Heimir Friðriksson 3, Magnús Stefánsson 1, Grétar �?ór Eyþórsson 1 og Theodór Sigurbjörnsson 1.

Stephen Nielsen varði sjö skot í marki ÍBV og Kolbeinn Aron Arnarsson þrjú.