Bjarni Benediktsson, fjármálaráðherra var einn þeirra fjölmörgu foreldra sem kom til Eyja í tengslum við TM mótið

„Það sem stóð upp úr var fyrirtaks skipulagning og gleði sem einkenndi allt mótshaldið. Ég verð líka að minnast á frábæra þjónustu og glæsilegan mat á öllum veitingastöðum og kaffihúsum sem við sóttum yfir helgina,“ segir Bjarni.   

Sigríður Inga, mótsstjóri, segir að þetta hafi verið fjölmennasta TM mótið hingað til, með 124 liðum frá 34 félögum. 

„Ég held að það sé hægt að gera ráð fyrir einum til tveimur gestum með hverri stelpu, þannig að í heildina hafa örugglega komið 1500 til 2000 gestir til Eyja vegna mótsins, að minnsta kosti, en örugglega töluvert fleiri.“  Segir Sigga Inga.

Nánar er farið yfir uppgjör TM mótsins í nýjasta tölublaði Eyjafrétta, sem kemur út á morgun 22. júní