Fjölskyldu- og tómstundaráð Vestmannaeyja hefur samþykkt tillögu að breyttu hlutverki æskulýðs- og tómstundafulltrúa sveitarfélagsins. Samkvæmt breytingunum verður starfið skilgreint sem starf tómstunda-, íþrótta- og forvarnarfulltrúa og því fylgir ný starfslýsing.

Málið var tekið fyrir á síðasta fundi ráðsins þar sem sviðsstjóri kynnti hugmyndir að breyttu hlutverki. Markmið starfsins verður að bera faglega, rekstrarlega og stjórnunarlega ábyrgð á deild tómstunda-, íþrótta- og forvarnarmála.

Í starfinu felst meðal annars stefnumótun, þróun, samræming og dagleg stjórnun á þjónustu sveitarfélagsins á sviði tómstunda, íþrótta og forvarna. Áhersla verður lögð á öfluga þjónustu fyrir íbúa á öllum aldri.

Ráðið samþykkti tillöguna að breyttu hlutverki og starfslýsingu. Í bókun ráðsins kemur fram að það taki jákvætt í breytingarnar og telji þær styðja við markvissa uppbyggingu og áframhaldandi þróun málaflokksins í þágu íbúa sveitarfélagsins.