„Áhöfn mun fara út á helginni og eftir helgi til að undirbúa heimsiglingu til Vestmannaeyja,“ sagði Guðbjartur Ellertsson framkvæmdastjóri Herjólfs í samtali við Eyjafréttir í dag, en samningar náðust á milli Vegagerðarinnar og Crist S.A. um afhendingu nýrrar Vestmannaeyjaferju í gær. „Ég geri ráð fyrir að undirbúningur taki einhverja daga en stefnt er að því að geta lagt í hann um aðra helgi og ekki seinna en þann 9. júní, sem er sunnudagur. Heimsiglingin ætti ekki að taka lengri tíma en 6 sólahringa þannig að við ættum að vera hér um miðjan mánuðinn,“ sagði Guðbjartur.

„Tilkynning kom nokkuð óvænt og hratt og því hefur undirbúningur verið mikill. Það þarf bæði að gera ákveðnar ráðstafanir í Póllandi og ekki síður hér heima en stefnt er að því að stytta eins og kostur er þann tíma sem tekur að koma nýju ferjunni í rekstur. Vonandi að það verði ekki meira en 10 til 15 dagar.  Við ættum því að geta hafið rekstur á nýju ferjunni í júní,“ sagði Guðbjartur sem vildi að endingu óska öllum með formlegum hætti til hamingju því Herjólfur er á leiðinni heim.