Handknattleiksdómarasamband Íslands (HDSÍ) hefur afhent viðurkenningar til leikmanna í efstu deildum karla og kvenna sem þykja skara fram úr fyrir háttvísi, góða framkomu og heiðarleika innan vallar sem utan.

Viðurkenningarnar voru afhentar á uppskeruhátíð Olís- og Grill66 deilda HSÍ sem fram fór í hádeginu í gær, þar sem verðlaun og viðurkenningar tímabilsins voru veitt.

Í karlaflokki hlaut Dagur Arnarsson, leikmaður ÍBV, viðurkenningu HDSÍ en í kvennaflokki kom hún í hlut Ásdísar Guðmundsdóttur úr Fram.

Viðurkenning HDSÍ er veitt þeim leikmönnum sem dómarar telja hafa sýnt af sér fyrirmyndarhegðun á keppnistímabilinu. Þar er horft til samskipta við dómara, andstæðinga og samherja, auk almennrar framkomu á leikvelli.