Umhverfis- og skipulagsráð Vestmannaeyja hefur samþykkt að hefja vinnu við breytingu á deiliskipulagi íþróttasvæðis við Hástein. Breytingin er nauðsynleg vegna fyrirhugaðrar uppbyggingar líkamsræktaraðstöðu fyrir World Class og niðurrifs elstu búningsklefa íþróttahússins.

Samkvæmt afgreiðslu ráðsins felst breytingin meðal annars í stækkun byggingarreits vestan við eldri íþróttasal hússins. Þar er fyrirhugað að byggja upp líkamsræktaraðstöðu samkvæmt útboðsskilmálum sem þegar liggja fyrir.

Tillagan var samþykkt með fjórum atkvæðum fulltrúa D- og E-lista. Fulltrúi M-lista greiddi atkvæði gegn henni.

Í bókun M-listans segir að mikil óánægja ríki vegna málsins og hafi hún meðal annars komið fram í greinarskrifum og hjá hagaðilum. Af þeim sökum muni Miðflokkurinn ekki styðja tillöguna.

Fulltrúar D-listans bókuðu á móti að þar sem samningar við rekstraraðila liggi þegar fyrir sé mikilvægt að halda ferlinu áfram svo unnt verði að byggja upp líkamsræktaraðstöðu í Vestmannaeyjum.

Jafnframt er tekið fram í bókuninni að íbúar og hagaðilar geti komið athugasemdum sínum á framfæri þegar breytingin á deiliskipulaginu fer í lögbundið kynningarferli.