Dýpkun í mynni Landeyjahafnar gekk mjög vel í morgun eftir að lítið hafði áunnist daginn áður. Þetta kemur fram í upplýsingum frá G. Pétri Matthíassyni, forstöðumanni samskiptadeildar Vegagerðarinnar.

„Dýpkunin gekk mjög vel í morgun en lítið sem ekkert í gær,“ segir Pétur. Horfur næstu daga eru taldar góðar og vekja vonir um að hægt verði að ná nægilegum árangri til að opna höfnina á ný.

„Útlitið næstu daga er mjög gott og við reiknum með og vonumst til að þessi gluggi fram undan dugi til að opna höfnina,“ segir hann. Á meðan heldur óbreytt fyrirkomulag samgangna áfram, en bæði Herjólfur og Baldur sigla til og frá Þorlákshöfn.

Áform eru um að taka nýjar dýptarmælingar á næstu dögum. „Við áætlum að mæla dýpið á þriðjudag eða á miðvikudag,“ segir Pétur. Framgangur dýpkunar mun ráða úrslitum um hvenær hægt verður að hefja siglingar um Landeyjahöfn á ný. Hér að neðan má sjá feril Álfsness á svæðinu undanfarnar klukkustundir.