Knattspyrnufélagið Valur hefur ráðið Hallgrím Heimisson yfirþjálfara barna- og unglingastarfs í fótbolta hjá félaginu.

Hallgrímur er 28 ára Vestmannaeyingur. Hann hefur þjálfað yngri flokka hjá Val auk þess sem hann er aðstoðarmaður Péturs Péturssonar hjá meistaraflokki kvenna.

Þrátt fyrir ungan aldur er Hallgrímur sprenglærður þjálfari með BSc gráðu í íþróttafræði, mastersgráðu í íþróttavísindum og þjálfun auk mastersgráðu í heilsufræði og kennslu.

Haft er eftir Styrmi Þór Bragasyni framkvæmdastjóra Vals á íþróttavefnum 433. is að Hallgrímur sé einn sá efnilegasti í dag og ljóst að þetta er mikill fengur fyrir félagið.

„Hann er vel skólaður í þessum fræðum með tvær mastersgráður og hefur komið inn til okkar af miklum krafti. Það er alveg ljóst hvert verkefnið hjá okkur er. Það mun fjölga gríðarlega í hverfinu hér á næstu árum og í dag eigum við aðeins einn uppalinn leikmann í Bestu deild karla. Þessu ætlum við að breyta og ráðning Hallgríms er liður í því,“ segir Styrmir Þór í samtali við 433.