Vekur vonir um sátt við Vestmanneyinga

„Með bréfi íslenska ríkisins til óbyggðanefndar, dagsettu 12. september 2025, féll ríkið frá öllum kröfum til eyja og skerja sem tilheyra Reykjavíkurborg,“ segir í frétt á mbl.is.
Fréttin vekur vonir um að hið opinbera gæti nú ákveðið að draga til baka sambærilegar kröfur gagnvart Vestmanneyingum, þar sem ríkið hefur um árabil reynt að sölsa undir sig allar úteyjar Vestmannaeyja og hluta af Heimaey.

„Af þessari breyttu afstöðu íslenska ríkisins er ljóst að ágreiningi ríkisins og Reykjavíkurborgar vegna þar tilgreindra eyja og skerja er nú lokið fyrir óbyggðanefnd,“ segir jafnframt á mbl.is, þar sem vitnað er í minnisblað Ebbu Schram borgarlögmanns, sem kynnt var á síðasta fundi borgarráðs.

Árið 2023 lagði ríkið fram víðtækar kröfur fyrir hönd óbyggðanefndar um eignarhald á flestum eyjum og skerjum við Ísland, bæði á sjó og landi. Síðan hefur verið dregið talsvert í land, en eftir standa þó kröfur um eyjar í Skagafirði og Vestmannaeyjum.

Líta má á þetta sem gullið tækifæri fyrir núverandi fjármálaráðherra til að ganga endanlega frá þessum málum og hreinsa upp eftir forvera sína sem sýndu litla sem enga miskunn í deilu við Eyjamenn.