Í dag kemur blað Eyjafrétta út og er fjölbreytt að efni sem er helgað Sjómannadeginum á sunnudaginn. Mörg áhugaverð viðtöl við fjölda fólks sem á einn eða annan hátt tengjast sjó og sjómennsku.

„Ég var borubrattur þegar ég mætti til Eyja um haustið með fullt rassgat af peningum inn á bók eftir fína afkomu á sjónum. Það er hollt fyrir unga fólkið að heyra það að þá varð maður að fjármagna námið sitt sjálfur og ég tók því alvarlega eins og félagar mínir í skólanum. Við vorum á heimavist á Heiðarvegi 1, sem kölluð var Heimir og við vorum samtaka peyjar. Við elduðum sjálfir ofan í okkur, skiptumst á viku og viku, tveir saman og fórum á bryggjuna á kvöldin og sníktum í soðið hjá körlunum sem voru að landa. Svo unnum við aukavinnu, vorum eftirsóttir í mjölútskipanir sem vel var greitt fyrir í akkorðsvinnu og í aðgerð í Nöf hjá Óskari Matt þegar landburður var af fiski á vertíðinni,“ segir Gunnar Egilsson pólfari með meiru í áhugaverðu viðtali Ásmundar Friðrikssonar við hann og Sæunni konu hans.

„Ég er að klára þriðja stig í skipstjórnarnámi sem heitir D-stig í dag og er kominn með ótakmörkuð réttindi í því bóklega en vantar tíma á sjó til að fá full réttindi nema á varðskip og allt sem því fylgir sem er í raun fjórða stigið,“ segir Páll Eiríksson á Herjólfi. „Ég veit ekki hvort maður á eftir að spreyta sig á varðskipadeildinni en þar er ekki kennt nema að Landhelgisgæslan biðji um það.“

„Eló er upprennandi tónlistarkona sem vakið hefur athygli fyrir persónuleg og lágstemmd lög sem endurspegla eigin reynslu, daglegt líf og ekki síst sterkar  tilfinningar,“ sagði Njáll Ragnarsson, formaður bæjarráðs þegar hann tilkynnti val á Bæjarlistamanni Vestmannaeyja 2025 í Eldheimum í vor.

„Ég hef alltaf heillast af sjónum og sjómennsku. Alveg frá því ég var gutti. Afi Hörður var mikið til sjós og mig hefur alltaf dreymt um að starfa á sjó. Líkar vel. Þetta er akkorðsvinna og heillar meira en að mæta í vinnu klukkan átta og hætta klukkan fjögur,“ segir Grétar Eyþórsson háseti á Sigurði VE, íþróttafræðingur, fyrrum handboltahetja og forstöðumaður Íþróttamiðstöðvarinnar, eiginmaður og faðir í flottu viðtali í blaðinu.

„Þegar ég var drengur fór ég oft á sjó með pabba, Friðriki Ásmundssyni. Hann var oftast með báta sem Fiskiðjan átti. Ég fór á sjó þegar veitt var á línu, net og líka á trolli. Ég man eftir því að ég fór með honum á Reyni VE 15 og það var veidd síld í nót. Fyrir utan Reyni fór ég með pabba á Sindra VE 203 á línu og troll, á Mars VE 204 fór ég með á línu, net og troll,“ segir Óskar Pétur sem ber saman netaveiðar fyrr og nú.

„Ég hef alltaf verið mikill Eyjamaður, úteyjakall, lundaveiðmaður og mikið náttúrubarn. Er alinn þannig upp. Er með Steingrímsgenin,“ segir Sigurður og vísar þarna til afa síns, Steingríms Benediktssonar fyrrum skólastjóra í Vestmannaeyjum. „Að sitja úti í eyju og hlusta á Gísla Steingríms var snilld. Hann gat talað í fimm tíma og sagt sögur af baráttu við eiturslöngur og öðrum ævintýrum sem hann lenti í þegar hann sigldi um heimsins höf,“ segir Sigurður Bragason í uppgjörsviðtali við Ómar Garðarsson.

Hér geta áskrifendur lesið blaðið. Blaðið er einnig selt í lausasölu á Kletti og í Tvistinum.

Hér má gerast áskrifandi.