Kvennalið ÍBV tekur á móti Þór/KA á Hásteinsvelli í dag í 4. umferð Bestu deildar kvenna. Flautað verður til leiks klukkan 14:00.

Eyjakonur hafa farið frábærlega af stað í sumar og unnið alla þrjá fyrstu leiki sína í deildinni. ÍBV er því í 2. sæti deildarinnar með níu stig, jafnmörg og topplið Breiðabliks, en með lakari markatölu.

ÍBV hefur skorað tíu mörk í fyrstu þremur leikjunum og fengið á sig sjö. Þór/KA kemur hins vegar stigalaust til Eyja eftir fyrstu þrjár umferðirnar og verður því í mikilli þörf fyrir stig.

Knattspyrnudeild ÍBV ætlar einnig að gera sérstaklega vel við stuðningsfólk í tilefni mæðradagsins og verður sannkölluð fjölskyldustemning á Hásteinsvelli.

Í hálfleik verður sérstakur kosningaleikur þar sem tvær mæður frá hverju framboði í Vestmannaeyjum keppa í vítaspyrnukeppni. Í markinu verður Ísey, sem samkvæmt tilkynningu frá knattspyrnudeildinni hefur fyrir löngu unnið sér inn orðspor sem sannkallaður vítabani. Knattspyrnudeildin hvetur Eyjamenn til að fjölmenna á völlinn og styðja við bakið á liðinu.