Öll möstrin fyrir nýju flóðljósin á Hásteinsvelli eru risin og ljósabúnaðurinn hefur verið tekinn í notkun. Enn á þó eftir að ljúka frágangi við möstrin og setja upp ljósastýringu, að því er fram kemur í frétt á vef Vestmannaeyjabæjar.

Búnaðurinn fyrir ljósastýringuna er væntanlegur í október. Þangað til er aðeins hægt að kveikja á ljósunum á fullum styrk, 500 lux. Þegar stýringin verður komin upp verður einnig hægt að stilla lýsinguna á 300 lux fyrir leiki í meistaraflokki og 200 lux fyrir æfingar og leiki yngri flokka. Fullur styrkur er ætlaður fyrir keppnisleiki sem sýndir eru í sjónvarpi.

Vestmannaeyjabær stefnir að formlegri vígslu flóðljósanna í október, þegar framkvæmdum verður lokið. Nánari upplýsingar um vígsluna verða birtar á miðlum bæjarins þegar nær dregur.