Varnarmaðurinn knái Sigurður Arnar Magnússon hefur framlengt samning sinn við knattspyrnudeild ÍBV um eitt ár og kemur því til með að leika með liðinu í Bestu deildinni 2023.

Sigurður, sem er 23 ára, lék vel í sumar með ÍBV en hann spilaði 26 af 27 leikjum liðsins í deild og úrslitakeppni. Hann skoraði fjögur mörk í sumar, tvö af þeim í sama leiknum gegn Frömurum þar sem hann lék á miðjunni.

Sigurður hefur allan sinn feril leikið með ÍBV að undanskildum fimm leikjum með KFS í 4. deildinni sumarið 2017 þar sem hann skoraði fjögur mörk. Samtals eru leikir Sigurðar í meistaraflokki orðnir 136 og mörkin 15, þrátt fyrir ungan aldur.

ÍBV fagnar fréttum þessum og hlakkar til næsta tímabils.

Mynd: Alexander Hugi Jósepsson.