„Það skiptir okkur hjá Creditinfo miklu máli að geta gert Framúrskarandi fyrirtækjum hátt undir höfði. Þetta eru stöðugustu fyrirtæki landsins sem leggja grunninn að kröftugu hagkerfi okkar Íslendinga. Það er einkar ánægjulegt að sjá hvað Vestmannaeyjar búa vel þegar kemur að öflugum fulltrúum á listanum í ár,” segir Hrefna Sigfinnsdóttir, framkvæmdastjóri Creditinfo á Íslandi. 

Alls fengu 16 fyrirtæki frá Vestmannaeyjum viðurkenningu Creditinfo sem framúrskarandi fyrirtæki 2025 sem afhentar voru við athöfn þann 31. október sl. Úttekt Creditinfo á rekstrarárangri íslenskra fyrirtækja fyrir árið 2025 sýnir að aðeins 1155 fyrirtæki, eða um 2,5% allra fyrirtækja á Íslandi, uppfylla þau ströngu skilyrði sem þarf að uppfylla til að hljóta viðurkenninguna Framúrskarandi fyrirtæki. Um er að ræða eitt virtasta rekstrarvottorð landsins sem byggir á fjölmörgum mælikvörðum um styrk, stöðugleika og áreiðanleika í rekstri.

Þetta kemur fram á heimasíðu Creditinfo. Til að komast á listann þurfa fyrirtæki að standast strangar kröfur á borð við jákvæða afkomu þrjú ár í röð, góðan rekstrarhagnað (EBIT), eiginfjárhlutfall sem er að minnsta kosti 20% og að rekstrartekjur fari ekki undir ákveðin mörk. Þá þurfa eignir að vera yfir 120 milljónum króna árin 2023 til 2024 og ekki undir 110 milljónum árið 2022.

Auk þess þurfa fyrirtæki að vera í lánshæfisflokki 1 til 3 hjá Creditinfo, hafa skilað ársreikningum innan lögboðinna tímamarka og vera virk samkvæmt skilgreiningu Creditinfo. Fyrirtæki með rekstrartekjur yfir 2 milljörðum króna þurfa jafnframt að fylla út sérstakan sjálfbærnisspurningalista, sem endurspeglar aukna áherslu á samfélagslega ábyrgð og sjálfbæran rekstur.

„Listinn yfir Framúrskarandi fyrirtæki er orðinn lykilmælikvarði á áreiðanleika í viðskiptum og er mikið notaður af bæði fyrirtækjum og fjárfestum sem vilja meta stöðugleika og rekstrarhæfni samstarfsaðila. Í ár endurspeglar hann enn á ný þau fyrirtæki sem hafa sýnt fram á stöðugan rekstur, sterka stöðu og fagleg vinnubrögð á óvissutímum,“ segir á heimasíðu Creditinfo.

Skilyrðin sem lögð eru til grundvallar eru meðal annars eftirfarandi:

• Jákvætt rekstrarárangur og jákvæð ársniðurstaða 2022–2024
• Rekstrarhagnaður (EBIT) > 0 á sama tímabili
• Rekstrartekjur a.m.k. 60 m.kr. árin 2023–2024 og 55 m.kr. árið 2022
• Eiginfjárhlutfall minnst 20% 2022–2024
• Eignir yfir 120 m.kr. árin 2023–2024 og yfir 110 m.kr. árið 2022
• Framkvæmdastjóri skráður í fyrirtækjaskrá RSK

Framúrskarandi fyrirtæki í Vestmannaeyjum 2025

• Bergur-Huginn ehf.
• Bylgja VE 75 ehf.
• Einsi Kaldi Veisluþjónusta ehf.
• Eyjablikk ehf.
• Faxi ehf.
• Frár ehf.
• HS Vélaverk ehf.
• Ísfélag hf.
• Karl Kristmanns umboðs- og heildverslun ehf.
• Kvika ehf. útgerð.
• Miðstöðin Vestmannaeyjum ehf.
• Narfi ehf.
• Ós ehf.
• SBS Asia ltd ehf.
• Skipalyftan ehf.
• VSV Seafood Iceland ehf.