Eins og við var að búast þá var nánast fullt út úr dyrum á íbúafundi um samgöngur sem haldinn var í Akóges í gær. Á þriðja hundrað manns mættu og á annað hundrað manns fylgdust með beinu streymi.

Sigurður Ingi Jóhannsson, innviðaráðherra og Bergþóra Þorkelsdóttir, forstjóri Vegagerðarinnar sátu fyrir svörum auk Fannars Gíslasonar, forstöðumanns hafnadeildar hjá Vegagerðinni.

Farið var vítt og breytt yfir stöðu mála bæði á sjó og lofti í framsögum ráðherra og vegamálastjóra. Farið var yfir dýpkunarmál auk þess sem komið var inn á jarðgöng og hafnarframkvæmdir. Að lokum var opnað fyrir fyrirspurnir úr sal. Þar mátti skynja talsverðar óþreygju og þreytu á stöðu þessara mála, enda hafa frátafir Herjólfs á siglingum í Landeyjahöfn verið talsvert miklar það sem af er vetri.

Fram kom í máli vegamálastjóra að dönsk verkfræðistofa muni fara í straummælingar í og við Landeyjahöfn. Auk þess kom fram að komið sé í ferli útboð á áætlunarflugi milli lands og Eyja yfir háveturinn. Hægt er að sjá upptöku af fundinum hér neðst í þessari frétt.

https://eyjar.net/ibuafundur-i-beinni/