Pysjutíminn í Vestmannaeyjum er formlega hafinn en fyrsta pysja ársins fannst á palli við heimili á Illugagötu.

Það voru systkinin Daníel Andri og Hrafnhildur sem fundu pysjuna á pallinum hjá ömmu sinni og afa. Pysjan reyndist 280 grömm að þyngd.

Pysjueftirlitið hvetur alla sem finna pysjur til að skrá þær á lundi.is svo hægt sé að fylgjast með fjölda þeirra. Ekki er skylt að vigta pysjurnar en þeir sem hafa tök á því eru hvattir til að skrá þyngdina.

Pysjutíminn er jafnan skemmtilegur en annasamur tími í Eyjum þegar lundapysjurnar yfirgefa holur sínar og halda til sjávar. Sumar villast inn í bæinn þar sem vaskir pysjueftirlitsmenn koma þeim til bjargar.