Stefán Friðriksson, forstjóri Ísfélagsins, notar tækifærið í uppgjöri félagsins fyrir fyrsta ársfjórðung til að svara gagnrýni sem beinst hefur að hagnaði sjávarútvegsfyrirtækja og fjárfestingum þeirra utan greinarinnar.

Í yfirlýsingu sinni vísar Stefán til nýrrar skýrslu Hagfræðistofnunar um fjárfestingar sjávarútvegsfyrirtækja og segir umræðuna um hagnað og arðgreiðslur greinarinnar oft einkennast af rangfærslum.

„Orðræða sumra þeirra sem standa á hinu pólitíska sviði, bæði aðal- og aukaleikara, um hagnað og arðgreiðslur sjávarútvegsfyrirtækja og fullyrðingar um leyndarhyggju í þessum efnum eru einfaldlega rangar,“ segir hann.

Stefán bendir á að hagnaður sé forsenda áframhaldandi fjárfestinga og uppbyggingar og að arðgreiðslur til hluthafa séu eðlilegt endurgjald fyrir það fjármagn sem þeir leggi fyrirtækjum til. Hann segir jafnframt að Ísfélagið hafi um árabil gert ítarlega grein fyrir umsvifum sínum í atvinnulífinu, bæði í ársreikningum, á heimasíðu félagsins og sem skráð félag á hlutabréfamarkaði.

Forstjórinn varar einnig við áhrifum hækkandi veiðigjalda og kolefnisgjalda og telur að slík skattheimta geti til lengri tíma dregið úr samkeppnishæfni íslensks sjávarútvegs og minnkað hvata til fjárfestinga.