TM mótinu í fótbolta í Vestmannaeyjum lauk í gær eftir þrjá frábæra keppnisdaga þar sem blíðskaparveður lék við gesti nær allt mótið. Stelpur í 5. flokki fjölmenntu til Eyja og léku listir sínar. 

Landsleikur TM mótsins fór fram á föstudagskvöldið í sól og blíðu. Hann var spilaður á tveimur völlum samtímis og töldu mörkin beggja megin. Leiknum lauk með 4-7 sigri pressuliðsins. ÍBV átti tvo fulltrúa í landsliðinu, þær Elenu Rut Einisdóttur og Ingunni Ásu Fannarsdóttur og stóðu þær sig vel. Landsleikurinn í ár var styrktarleikur fyrir tvær ungar stelpur sem hafa barist við erfiða sjúkdóma og tengjast TM mótinu sterkum böndum, þær Guðbjörg Silla Viðarsdóttir og Kolfinna Rán Færseth. 

Eftir landsleikinn fór fram kvöldvaka þar Tónhylur tróð upp við mikinn fögnuð. Kvöldvakan hófst með því að veitt voru verðlaun fyrir hæfileikakeppnina, sem fór fram á fimmtudagskvöldið, og var það ÍR sem stóð uppi sem sigurvegari. Fram varð í öðru sæti og ÍA í þriðja. Þá hlaut KR viðurkenningu fyrir besta stuðningsatriðið og Skallagrímur fyrir frumlegasta atriðið. 

Á laugardeginum fóru fram úrslitaleikir mótsins. Lið Þróttar R. og Aftureldingar léku til úrslita um sjálfan TM móts bikarinn og var það Þróttur R. sem stóð uppi sem sigurvegari TM mótsins 2026 með 3-0 sigri. Mótinu lauk með grillveislu við Týsheimilið eftir úrslitaleikinn.

Hægt er sjá úrslit úr jafningjaleikjunum sem fóru fram á laugardeginum hér.

Sigfús Gunnar Guðmundsson og Óskar Pétur Friðriksson tóku myndir af upprennandi fótboltastjörnum á mótinu sem hægt er að sjá hér að neðan.