Fólk er fyrr á ferðinni
Magnea Jóhannsdóttir verslunarstjóri hjá Icewear í Vestmannaeyjum er spennt fyrir jólavertíðinni. „Hún leggst mjög vel í okkur, allir klárir að hjálpa til við að finna réttu jólagjöfina. Desember er eflaust með stærri mánuðum ársins á eftir sumarmánuðunum.“ Aðspurð um breytingar á jólaverslun Eyjamanna var Magnea ekki í vafa. „Já þetta er fjórða árið mitt núna hjá Icewear og mér finnst mesta breytingin vera sú að margir eru búnir að versla gjafir áður en Desember rennur upp. Það eru mjög margir sem nýta sér tilboðin sem eru í kringum alla afsláttadagana í lok nóvember.“

Magnea segir eitthvað um nýjungar hjá þeim fyrir jólin. „Það eru að detta inn fullt af nýjum vörum í viðbót við það sem hefur komið inn eftir sumarið. Einnig hefur komið áfylling á vinsælustu vörurnar hjá okkur.“

Hver er jólagjöfin í ár frá Icewear? „Ég myndi segja að jólagjöfin í ár frá Icewear er flík úr ullarlínunni okkar. Við bjóðum upp á fjölbreytt úrval af fatnaði sem er fóðraður með íslensku ullinni. Þessar vörur eru einstaklega léttar og þægilegar en þó á sama tíma mjög hlýjar.“