Karlalið ÍBV í handbolta tapaði gegn KA í fyrsta leik í einvíginu milli þessara liða, í 8-liða úrslitum úrslitakeppni Olís deildar karla um íslandsmeistaratitillinn, í Eyjum í kvöld. Leiknum lauk með 33-34 sigri KA eftir tvíframlengdan leik.

Jafnræði var með liðunum í fyrri hálfleik en KA menn voru yfir eftir stundarfjórðung, 5-6. KA menn spiluðu betur seinna hluta fyrri hálfleiks og komust mest þremur mörkum yfir, 9-12. KA menn leiddu í hálfleik með tveimur mörkum. Staðan í hálfleik 11-13. 

KA menn héldu forystu sinni í síðari hálfleik og voru með yfirhöndina. Erlingur Birgir Richardsson, þjálfari ÍBV, fékk að líta rauða spjaldið þegar stundarfjórðungur var eftir og Róbert Sigurðsson, leikmaður ÍBV, einnig fimm mínútum síðar. 

Eyjamenn gerðu vel og jöfnuðu leikinn þegar tíu mínútur voru til leiksloka í 21-21. Lokamínútur venjulegs leiktíma voru hnífjafnar. ÍBV komst tveimur mörkum yfir þegar aðeins tvær mínútur voru eftir en KA menn jöfnuðu leikinn í 26-26 fyrir lokaflautið. Allt jafnt og því þurfti að framlengja. 

Staðan var aftur jöfn eftir fyrri framlenginguna, 31-31, en KA menn voru sterkari í seinni framlengingunni og unnu að lokum eins marks sigur. Lokatölur leiksins 33-34.

Dagur Arnarsson, leikmaður ÍBV, var markahæstur með tíu mörk. Petar Jokanovic varði 20 skot í marki ÍBV.

Mörk ÍBV: Dagur Arnarsson 10 mörk, Elís Þór Aðalsteinsson 7, Sveinn José Rivera 5, Anton Frans Sigurðsson 3, Daníel Þór Ingason 3, Kristófer Ísak Bárðarson 2, Nökkvi Dan Óðinsson 2, Sigtryggur Daði Rúnarsson 2.

Valur og HK áttust einning við í kvöld í 8-liða úrslitum. Valur vann fjögurra marka sigur, 42-38.

ÍBV sækir KA heim á Akureyri í öðrum leik í einvíginu, sunnudaginn 29. mars kl. 15:00.  Eyjamenn eru með bakið upp við vegg og þurfa nauðsynlega á sigri að halda. Takist KA að vinna tryggja þeir sér sæti í undanúrslitum.