Ísfélag hf. hagnaðist um 2,8 milljarða króna árið 2025 og jukust tekjur félagsins í 27,4 milljarða króna, samkvæmt nýbirtu ársuppgjöri.

Rekstrarhagnaður nam 7,9 milljörðum króna og EBITDA var 10,1 milljarður króna, sem endurspeglar sterka afkomu félagsins á árinu. Aukningin skýrist meðal annars af háu verði á helstu afurðum, góðum makrílveiðum og sterkum rekstri frystitogarans Sólbergs.

Félagið fjárfesti töluvert á árinu, meðal annars í uppsjávarskipinu Heimaey VE, stækkun mjölverksmiðju í Vestmannaeyjum, nýrri frystigeymslu á Þórshöfn og nýjum vinnslubúnaði. Þá tók Ísfélagið þátt í hlutafjáraukningu í laxeldisfyrirtækinu Kaldvík.

Efnahagur félagsins er áfram sterkur. Heildareignir námu 108,4 milljörðum króna í árslok 2025, þar af voru fastafjármunir 89,2 milljarðar og veltufjármunir 19,2 milljarðar króna. Eigið fé var 71,0 milljarður króna og skuldir og skuldbindingar 37,4 milljarðar króna.

Í yfirlýsingu Stefáns Friðrikssonar, forstjóra félagsins kemur fram að afkoman hafi verið góð, þó að veiking bandaríkjadals og aukin fjármagnsgjöld hafi haft neikvæð áhrif. Hann bendir jafnframt á að horfur séu krefjandi, meðal annars vegna hækkandi veiðigjalda og kolefnisgjalda, auk samdráttar í veiðiheimildum í makríl og kolmunna.

„Miklar hækkanir á sköttum eins og veiðigjaldi og kolefnisgjaldi munu hafa neikvæð áhrif á reksturinn strax á yfirstandandi ári og áhrifin verða enn meiri á næsta ári, þegar afslættir vegna veiðigjaldsins verða að mestu felldir niður og skatturinn leggst á sjávarútvegsfyrirtækin af fullum þunga. Ef veiðigjöld ársins 2026, án tímabundinna afslátta, eru reiknuð fyrir Ísfélagið m.v. afla ársins 2025, að öllu öðru óbreyttu, hækka veiðigjöldin árið 2026 um tæplega hálfan milljarð króna samanborið við veiðigjöld ársins 2025, eða úr 1,0 milljarði króna í 1,5 milljarð króna. Kolefnisgjöld félagsins hafa hækkað um yfir 60% á milli áranna 2024 og 2025, úr 226 milljónum króna í 372 milljónir króna. Ég vek athygli á því að þessir skattar eru langtum hærri hér á landi en í samkeppnislöndum okkar ef þeir eru á annað borð þar fyrir hendi.

Skattahækkanir munu óhjákvæmilega minnka getu og draga úr áhuga á að fjárfesta í sjávarútvegi á Íslandi, að öllu öðru óbreyttu. Slíkt mun leiða til lægra skattspors greinarinnar til framtíðar. Færa má fyrir því rök að lagasetningin, sem útreikningur og álagning veiðigjaldsins byggir á, standist ekki grundvallarreglur og áskilnað stjórnarskrárinnar um skattlagningu,” segir Stefán.