Eyjamaðurinn Hákon Daði Styrmisson leikmaður Gummersbach gerir sér góðar vonir um að fá grænt ljós til þess að mega æfa á fullu á nýjan leik með samherjum sínum eftir eina til tvær vikur.

Hann staðfesti þetta í skilaboðum til handbolta.is. Hákon Daði sleit krossband skömmu fyrir síðustu áramót.

„Ég er að búast við að fá grænt ljós eftir næstu viku eða í þar næstu viku og megi þá byrja á fullu í handboltanum og vera útskrifaður af þessum meiðslum,“ sagði Hákon Daði.

Handbolti.is

Gummersbach leikur í 1. deild á keppnistímabilinu sem hefst um næstu helgi. Guðjón Valur Sigurðsson er þjálfari liðsins.

Hákon Daði er samningsbundinn Gummersbach fram á mitt árið 2024.