Eyjamaðurinn Hákon Daði Styrmisson samdi í dag við þýska handknattleiksliðið Eintracht Hagen sem leikur í næst efst deild. Keppni í 2. deild hófst í kvöld en Hagen á leik á morgun á heimavelli gegn Bietigheim. Standa jafnvel vonir til þess að Hákon Daði verði í liðinu strax í fyrsta leik. Hann staðfesti vistaskiptin við handbolti.is síðdegis í dag.


Fá tækifæri hjá Gummersbach
Hákon Daði hefur þar með yfirgefið Gummersbach eftir tveggja ára veru. Hann var að hefja sitt þriðja tímabil með Gummersbach en var kominn í þá stöðu að vera þriðji í röðinni af vinstri hornamönnum eftir samkeppnin jókst með komu þriðja vinstri hornamannsins í sumar. Fyrir vikið kom hann lítið sem ekkert við sögu í æfingaleikjum fyrir tímabilið eða í tveimur fyrstu leikjum Gummersbach í 1. deild.

„Vegna stöðunnar hef ég verið að leita að öðru liði til þess að spila með. Loksins í dag þá samdi ég við Hagen,“ sagði Hákon Daði við handbolta.is.